Кировы районы Змейкæйы байгом кодтой ног амбулатори. Бæстыхай ифтонг у æппæт хъæугæ кусæнгæрзтæй. Лæггад кæндзæн аст мин адæймагæн. Бынæттон цæрджытæ уыцы цаумæ рагæй æнхъæлмæ кастысты. Амбулатори байгом кæныны кадджын мадзалы архайдтой республикæйы хицауады уæнгтæ, районы разамынд.

Плиты Кристинæ сывæллонæй бæллыд дохтыр суæвынмæ. Медицинон институт каст куы фæци, уæд дызæрдыг дæр нæ кодта, кæм кусдзæн, ууыл. Æмæ ныр 2 азы лæгад кæны йе мхъæуккæгтæн. Змæйкæйы амбулаторийы раздæры бæстыхай цавæр уыдис, уый искæй ныхæстæм гæсгæ нæ зоны.

Федералон программæ æххæст кæнгæйæ, республикæйы хицауад ссардта мадзæлттæ хъæуы ног амбулатори байгом кæнынæн.

Фæстаг афæдз ахæм дзæбæхгæнæндæттæ районы байгом сты алы хъæуы дæр. Сæрмагондæй Змæйкæйыл дзургæйæ та, сбæлвырд кодтам уый, æмæ сын стыр æххуыс бакодта районы разамынд.

Амбулатори ифтонг у нырыккондæр техникон фæрæзтæй æмæ кусæнгæрзтæй. Ис сæм хъæугæ хостæ. Суанг ма лаборатори дæр. Уый та зынгæ фенцондæр кæндзæн дохтырты куыст дæр, цæрджытæн дæр æнцондæр уыдзæн.

Ныртæккæ Змейкæ, Ираныхъæу æмæ Ставд-Дурты цæрджытæ цин кæнынц сæ ног амбулаторийы бæстыхайыл. Суанг ма хъазт дæр сарæзтой.

Се ппæты дæр ныфс ис, хъæуы социалон фарстатæ алыг кæнынæн хицауад алывæрсыг æххуыс кæй кæндзæн, уымæй.

Зыхъуаты Жаннæ