Авиацийы хъæбатыры кадæн. Дзæуджыхъæуы байгом Артур Кацияны номарæн фæйнæг. Уый уыд фыццаг цæгатирыстойнаг тæхæг.

Йе руаджы горæты цæрджытæ фыццаг хатт федтой хæдтæхæг. Артур Кациян архайдта фыццаг дунеон хæсты. Йæ хъæбатырдзинады тыххæй йæ 2 хатты схорзæхджын кодтой Георгийы дзуарæй. Уыимæ ма уыдис нывгæнæг, скульптор, къамисæг. Йæ нывтæ абон дæр сты Тугъанты Махарбеджы музейы фонды. Йæ царды бирæ уæззау цаутæ уыдис. 1922-æм азы йæ æрцахстой. Аххосджын æй кодтой, мæнг æхцатæ кæй цæттæ кодта, уыцы хъуыддаджы. Ахæстоны фæцис 2 мæйы. 1943-æм азы та йæ ногæй æрцахстой. Азымджын æй кодтой, Бирæгъзæнджы оккупацийы рæстæг немыцаг комендатурæйы тæлмацгæнæгæй кæй куыста, уымæй. Цалынмæ хъуыддаг бæлвырд кодтой, уæдмæ йе 'нæниздзинад фæцудыдта. 23 майы Артур Кациян ахæстоны рынчындоны йæ цардæй ахицæн. Бирæ азты фæстæ йæ сраст кодтой. Абон хъæбатыры ном æрхъуыды кæнынмæ æрбацыдысты ветерантæ, æхсæнады минæвæрттæ, сомихаг национ-культурон центр "Эребуни"- йы уæнгтæ, скъоладзаутæ.

Бедойты Руслан, ДОСААФ-ы цæгатирыстойнаг хайады сæрдар: "Уый уыдис стыр лæг, стыр йæ хъуыддæгтæм гæсгæ, нывгæнæг дæр уыд, тæхæг дæр уыд. Уый цас пайда скодта Ирыстоны кадæн, уый бирæты къухы не фты. Æгайтма абон ахæм хъуыддаджы фæдыл æрæмбырд стæм. Дарддæр дæр йæ ном рох куыд нæ уа, Хуыцау уый зæгъæд".